Public Speaking Kya Hai?
Public speaking ka seedha sa matlab hai ek ya ek se zyada logon ke saamne apni baat saaf tareeke se rakhna. Ye sirf stage par bhaashan dene tak seemit nahi hota. School me presentation dena, office ki meeting me apni rai rakhna ya kisi function me kuch shabd bolna bhi public speaking ka hi hissa hai.
Sabke saamne bolna har kisi ke liye shuruaat me aasaan nahi hota. Pehli baar bolte waqt kai log ghabra jaate hain, kuch apni baat bhool jaate hain aur kuch bolne se hi bachne lagte hain.
Lekin iska matlab ye nahi ki public speaking sirf kuch logon ko hi aati hai. Baaki kaamon ki tarah ye bhi ek aisi aadat hai jo samay aur lagataar koshish ke saath behtar hoti chali jaati hai. Isi article me hum aise practical tareeke dekhenge jo sabke saamne bolne ki jhijhak ko kam karne me madad kar sakte hain.
Public Speaking Ka Dar Hone Ki Sabse Badi Wajah Kya Hai?
Kabhi-kabhi bina taiyari ke hi bolne ka mauka mil jaata hai.
Teacher achanak khada kar dein, office me kisi meeting ke dauran tumse rai poochh li jaaye ya kisi function me do shabd bolne ke liye bula liya jaaye. Aise waqt me sabse pehle bolne ka nahi, balki galti ho jaane ka dar lagta hai.
Dimaag me ek saath kai baatein chalne lagti hain.
“Agar baat bhool gaya to?”
“Log kya sochenge?”
“Meri baat theek se samajh aayegi ya nahi?”
Jab dhyan apni baat se hatkar in sawaalon par chala jaata hai, tab bolna aur mushkil lagne lagta hai.
Sabke Saamne Bolne Se Pehle Thodi Taiyari Kar Lo
Agar pehle se pata ho ki kis baare me bolna hai, to uske liye thoda samay nikaal lena hamesha faydemand rehta hai. Poora yaad karne ki zarurat nahi hai. Bas itna samajh lo ki shuruaat kis baat se karni hai, beech me kya kehna hai aur aakhir me kis tarah baat poori karni hai.
Chaaho to ek-do baar ghar par bolkar bhi dekh sakte ho. Isse ye pata chal jaata hai ki kahaan rukawat aa rahi hai aur kis jagah thoda aur dhyan dene ki zarurat hai.
Har Baar Sabko Prabhavit Karne Ki Mat Socho
Sabke saamne bolte waqt bahut logon ka dhyan apni baat se zyada is baat par rehta hai ki saamne wale kya soch rahe honge.
“Kahin meri baat pasand na aaye…”
“Kahin log bore na ho jaayein…”
Isi chakkar me bolte waqt aur ghabrahat badhne lagti hai.
Jab bhi bolne ka mauka mile, sirf itna socho ki apni baat saaf tareeke se rakhni hai. Har insaan ko khush karna ya sabko prabhavit karna zaroori nahi hota.
Chhoti Maukon Se Shuruaat Karna Behtar Rehta Hai
Agar ab tak kabhi sabke saamne bolne ka mauka nahi mila, to pehli baar hi bahut saare logon ke saamne khade hone ki zarurat nahi hai.
Ghar par apne parivaar ke saamne koi chhoti si baat kehkar dekh sakte ho. Doston ke saath baithkar bhi apni baat poori tarah rakhne ki aadat bana sakte ho. Jab itne logon ke saamne bolna aasaan lagne lage, tab dheere-dheere bade mauke bhi utne mushkil nahi lagte.
Agar Pehli Baar Baat Waise Na Ho, To Usi Par Mat Ruk Jaana
Pehli baar sabke saamne bolte waqt ruk jaana, kuch baatein bhool jaana ya awaaz ka halki pad jaana bilkul aam baat hai. Iska matlab ye nahi ki tum achha bol hi nahi sakte. Bolne ke baad bas ek baar itna soch lo ki kis jagah dikkat hui thi. Shayad jaldi-jaldi bol diya ho, shayad taiyari thodi kam reh gayi ho ya shayad ghabrahat ki wajah se baat poori na kar paaye ho.
Agar agli baar usi ek baat par dhyan de diya, to pehle ke muqable bolna aasaan lagne lagega. Isi tarah dheere-dheere sabke saamne bolne ki jhijhak bhi kam hone lagti hai.
Aakhri Baat
Sabke saamne bolna har kisi ke liye shuruaat me aasaan nahi hota. Kai log pehli baar bolte waqt ruk jaate hain, kuch baat bhool jaate hain aur kuch ki awaaz hi halki pad jaati hai. Iska matlab ye nahi ki wo kabhi achha nahi bol paayenge.
Bolna bhi baaki cheezon ki tarah ek aadat hai. Jitne zyada mauke milte hain, utna hi isme aasani aane lagti hai. Isliye agar aaj bhi sabke saamne bolne me jhijhak hoti hai, to usse bachne ki jagah chhote maukon se shuruaat karo. Thodi taiyari aur baar-baar koshish karne se ye jhijhak pehle jaisi nahi rehti.
- Related Articles
- Self-Confidence Kaise Improve Karein?
- How to Improve Communication Skills in Daily Life
- How to Prepare for a Job Interview
Public Speaking Se Pooche Jaane Wale Sawal
Kya sabke saamne bolte waqt ghabrahat hona aam baat hai?
Haan. Pehli baar ya kam mauke milne par ghabrahat hona bilkul aam baat hai. Bahut se log shuruaat me aisa hi mehsoos karte hain.
Agar bolte waqt baat bhool jaaye to kya karein?
Ek pal ruk jao aur aaram se socho ki aage kya kehna tha. Jaldi me kuch galat bol dene se behtar hai do-teen second rukkar apni baat fir se shuru karna.
Kya sab kuch yaad karke hi bolna chahiye?
Nahi. Sirf itna yaad rakho ki kis baat ke baad kya kehna hai. Har line yaad karne ki koshish karoge, to ek line bhoolte hi poori baat ulajh sakti hai.
Sabke saamne bolne ki jhijhak kam hone me kitna samay lagta hai?
Iska koi tay samay nahi hota. Ye is baat par nirbhar karta hai ki tumhe bolne ke kitne mauke milte hain aur tum un maukon ka kitna fayda uthate ho.
Agar public speaking ke baare me aur seekhna chahte hain, to Toastmasters International ki official website bhi dekh sakte hain.